Dei tok seg fram gående, springande eller på sykkel. Men felles for samtlege 250 var ein sterk vilje. Utan det er det heller ikkje tilrådeleg å prøve på dei 1500 høgdemeterane frå Geiranger sentrum til toppen av Dalsnibba. Cato Slinning (sykkel) og Terje Hole tok seg raskast til toppen.
Av Atle Hole

Dermed vart vandrepremien i herre-klassa, oppsett i 1997, svært kortliva. Åndalsnesingen Terje Hole, med solide røter nettopp frå Geiranger, vann på laurdag slik han gjorde det i 1999 og 1997. Med siger også i 1996 har 39-åringen, som tidlegare er norsk meister i maraton, vunne i alt fire av sju løp i Geiranger halvmaraton.

Laurdag kunne instruktøren frå Setnesmoen, som no representerer Åndalsnes idrettsforening, sette Olav Slettebak sitt fantastisk fine handverk (eit ølanker) i premiehylla for godt.
Det er han truleg glad for, ettersom unge Hans Martin Gjedrem har utvikla seg til å bli ein lei konkurrent. I fjor var avstanden mellom dei to over elleve minutt, i år 25 sekund. Like etter målpassering, 1.33.59 for Hole sin del, utveksla dei to erfaringar:
- Du sprakk ikkje i år!
- Nei, ifjor kunne eg nesten ikkje stå på beina etter målpassering. Eg lærte mykje av det løpet. Denne gongen prøvde eg halde eit jamnare tempo, men etter sju kilometer hadde eg problem med å halde deg. Heldigvis kvikna eg til igjen.
- Eg frykta ein spurtduell.
- Ja, det var irriterande at eg ikkje skulle greie å tette siste luka. Eg prøvde så godt eg kunne, men 500 meter før mål innsåg eg slaget var tapt.
- Neste år slår du meg, sa vinnar Hole oppmuntrande til unge Gjedrem, og det skulle ikkje forbause oss om så skjer. Denne gongen trur vi faktisk Hole var lengst ned i «kjellaren» etter krefter mot slutten av løpet. Men det betalte seg.

Spreke honndøler
I halvmaraton var det «mykje sjø» mel-lom dei beste. Frå duoen Hole/Gjedrem var i mål gjekk det ti minutt før Roger Lillestøl (tre også ifjor) og Ola Ulset kom. Så gjekk det nye fem minutt før Tom Gretland kom inn til femteplass. Om ikkje Hans Martin Gjedrem fekk beste tid mellom herrane, kunne han glede seg over at kjærasten Jori Mørkve med 2.21.11 var best av dei fire kvinnene, vel sju minutt betre enn Coby Ytredal.

I alt deltok 93 løparar i halvmaraton, ti mindre enn i fjor, men likevel eit bra tal med tanke på kollisjon med Jonsokmila. Hornindal var einaste klubb med tosifra del-takartal. Ein av desse var Ragnar Seljeset. Han har vore på plass kvart år i Geiranger, men i år var det berre så vidt. Men gipsen kom av i tide, og Seljeset kneip ein fin femteplass på 2.17.44 i klasse 35-39 år. Skiverdsmeister Arild Monsen frå Molde har vore ein av pådrivarane for at også syklistane skulle få sleppe til i Geiranger.

I år gjekk debuten, og det vart ein ubetinga suksess. Ikkje uventa vann Cato Slinning frå Alesund og Omegn Cykleklubb, med tida 1.13.16. Slinning gjekk tidleg frå dei øvrige, og var aldri direkte trua, sjølv om Sveinung Talberg frå Vågstranda tok innpå mot slutten. Landslagstrenar i off-road, Ole Kristian Silseth frå Molde vart nummer tre, Arild Monsen nummer fem.

Ingun Løitegård, IL Noringen, vart best av tre damer på svært respektable 1.45.08, med Else Ragni Ytredal frå Norddal på andreplass.

Prest med tæl
Nibberittet var nok tyngre enn mange hadde tenkt seg. 51 deltakarar deltok men berre 12 av desse sykla raskare enn løpsvinnar Hole sprang. Særleg slutten var tøff på dei våte grusvegane.
- Dagen før rittet var det ingen ting som tyda på at det skulle vere mogleg å sykle heilt opp på Dalsnibba. Snøen lava ned, og den alternative løypa var klar. Heldigvis fekk vi veromslag, og vegen opp vart opna klokka ti rittdagen, fortel Per Ivar Gjørvad, og vert supplert av den andre primus motoren i arrangementet, Terje Rusten.
- Men vi hadde nesten rekna med godt vêr ettersom soknepresten frå Stranda, Hans Jørgen Morvik, og ein misjonær med seks års teneste frå Etiopia (Steinar Myklebust) var blant deltakarane.
- Det gjekk greitt. Fin tur. Ingen problem verken med mann eller ein nær sagt uforskamma sprek Morvik i det han fekk medaljen hengt rundt hovudet like etter målgang.

Hardhausar
Miniton løpet frå sentrum til Flydalsjuvet samla 27 deltakarar. Nibbemarsjen 83. Familien Sunde frå Haddal i Ulstein, sprang først miniton-løpet før dei heldt fram heilt til toppen av Dalsnibba. Tøft gjort, særleg av yngstejenta Elisabeth, som berre var ni år.
Og elles var dei i Geiranger dei vanlege hardhausane over 60 år, som Palmar Muren, Oddvar Rønneberg, Svein Ertesvåg, Karstein Sørland og Ola Goksøyr.

Vi stiller oss tvilande til om oppstiginga med nummer på brystet gir den heilt store naturopplevinga, men nedturen derimot; den burde gje rom for ettertanke etterkvart Som det mektige skaparverket kjem til syne nedover mot fjorden og dalbotnen. Fyrst på nedturen trur vi deltakarane fattar at nettopp denne dagen i livet sitt har dei gjort ein prestasjon langt utover det vanlege. Og det gjeld for samtlege, anten tida vart 1.57.44 eller 3.03.49

Vel blåst til arrangørane i idrettslaga i Geiranger og Eidsdal for ei ny vellukka helg. Ved neste korsveg kan deltakartalet bli endå større, i alle høve sykkeldelen har eit klart vekstpotensial.